veur Michelle

Doppio? vruig ze. k Haar
vroagd om n dubbele espresso,
mor doppio haar zok overaal
al oardeg nuzzeld, zo bleek
in t Drintse dörp woar k neerstreek
om dit gedicht te moaken,
mor dat wos k toun nog nait.
k Haar mien pedde op van Excelsior
Rötterdam. t Café zat vol,
liek as k zulven votdoadelk mit
bokbier, saté en haile dikdakkerij der omtou.
Aan bar haren ze t hogste woord
over Ajax, trainers dij nait deugen deden
en ok dij oavend nog aaid deurroazende
oorlog tegen Oekraïne woar nait
over proat wur ‘als wäre es vorbei’,
mor dij mie in kop hoageld was.
k Dochde aan Katja Petrowskaja,
heur lieden aan machtelooshaid
en over roeghaid in Europa.
Dou mie nog mor n doppio,
vruig k. Zunder suker. t Kon mie
nait bitter genogt wezen.


(‘Als wäre es vorbei’, verwiezen noar bouk van Katja Petrowskaja.
Katja Petrowskaja, als wäre es vorbei. Texte aus dem Krieg. Suhrkamp Verlag, 2025.)