t Is nait te verdroagen dij insektenploagen.
Ongedaaierte nibbelt aan dien doagen.
Smörns as zun mit naacht stried aanbiendt
veren zai op, dij opvreters van dien tied.

Bis van bèr òf, kaams dien lokken,
mos tannenpoetsen, kaauwen zai aan klokken.
Heurs koekoeksklok gedureg sloagen.
Aalweer is ter n mörn noar de moan.

Doe bis van slag òf, te loat mit eten.
Krigs pap, n uurtje loader mirregeten.
Ook bie mirregsloapke wordt ja tied vervreten.
Zo schut ja op, is n daag gaauw verstreken.

Soavens veur sloapen goan speuls doe patience.
Dij daiven van dien tied laggen en sjanzen
as zai nog n moal aan menuten knoagen.

Doe gaais op bèr, bis tou aan rust.
Op slag zit dat goud weer noast dien nust.
Òfstolen tied brobbelt ien heur moagen.