Portrett van en Polder
bi Sömmerdag: De Maandag

Dat veerkante Land
kummt weer vandagte veurschien in ’t halve Düüstern
un Autolüchten haasten in d’ Feernte
over Straten na d’ eerste Schicht.
Ok dat Quarteer word wacker, Mensken
stappen in Autos of lopen na d’ Busstopp,
wachten daar in dat Graffiti-Gemaggel
van dat Glashuuske, waar de Sünn
sachtfoots dat Terrain verovert, un all,
wat liek un dwars un kanterg is,
kummt weer in Sicht. To d’ Melktied
streven Kohjen in en lange Rieg up en
Plaatsboerderij an in d’ Oosten. Treckers, Autos:
unnerwegens in de lechte Mörgen.
Na d’ Noorden hen: Baggers un Maschienen
frötenvreten sük in dat Grönland för en
neei Gebau – bit over d’ Middag – un in
de Avend. Autos komen na Huus un
Fensters flickern up van Avend-Soaps
bit de Sünn weer stuuv over d’ Seediek
steiht, denn daalt, denn verdwient –
un de Polder an de Nacht verlüst.
Klik op woorden mit puntjes doaronderHier verschient vertoalen. veur n vertoalen.
Ale dailen van de cyclus Portrett van en Polder bi Sömmerdag:
Prolog | De Sönndag | De Nacht | De Maandag | Epilog