Vandoag vangt mien kat
n Jonge spitsmoes, och goi…
n Gries minimoeske
Mit n hail spitse snoet
En n hail dun steertje
As n roavelg taauwke
Ien vieftien tellen
Opvreten mit hoed en hoar

n Uur loader, groot paniek
Koader het n jonge sprutter
Hai leeft nog en fladdert
Ik sloet kat op ien hoes
Vang sprutter zet hom op heeg
Hai vlucht n poar meter
Vaalt den op grond
Dij gaait t nait redden

Ik zel netuur den mor
Zien gang goan loaten
Kat weer ien boeten
Noa tien menuten is kat
Weerom sprutter ien bek
Nou komt haile vogelwereld
Ien aksie kraai merel mus
Oakster komt oetdoagend vlakbie

Sloom stöt kat sputter aingoal
Mit poot vogel blift liedsoam
Wachten op n volgende tik
Wait ik mout mie dood holden
Ik dou hom ien schuur
Verdwoasd en verschrikt
Schut e onder n stoabel holt
Deuren dicht

Noa n zetje heur ik vogel
Fladdern – toch – deuren weer open
Sprutter vlucht vot
Oet t oog oet mien
Verantwoorden
Veur moes en vogel
Ik blief achter
Ien toeze