Vuurpiel, vrijhaid en vree
Der gaait n vuurpiel de lucht ien, mor t is gain nij-joar.
Loopjong mit zien hoazege snoet stapt ons jeugdhonk ien,
en wie snoeven meugelkheden op, mit verwachtens ien lien.
t Leven wordt licht, gedachten daiper, oogleden swoar.
Wereld draait weer veuls te gaauwachteg veur mien kop,
mien koak staait stiefoet, t swait gutst mie van t lief.
Sloap wil mor nait komen, klok springt op drij, vaaier, vief.
Witte flitsen boven mien ogen lichten bie naacht t duuster op.
En ik zeg dat t beurd is, mor aander week zel t vannijs zo goan.
n Knitter zo daip as n verstikkende veenloag schaaidt mien ollu en mie.
Zai rieken mie n haand, mor ik wait: dit gaait nait morzo veurbie.
Mit heur en mien vrijhaid en vree is t veurgoud finoal doan.
Goud zond opgruien
Ollu waren drok mit eterij veur jongen ien t nust,
n waarm jak om t lief, n schoun dij n wankele vout stut,
gain plastic, schaarpe houken, lòzze oetsteekbrud,
verhoaltjes veurlezen, raainhaid, regelmoat, rust.
Appelsienen veur grui, melk veur staarke bonken,
genog sloap om hazzens heur rust te geven,
aan t begun van n laank en gezond leven.
En kiek es hou nuver heur kiender toch blonken.
Ien veuroavend gaait der non n vuurpiel lucht ien
en jongen wachten mit rooie ogen vol frustroatsie
op ain op n plof mit puutjes magic fairy dust.
Zai zitten slecht ien heur hoed, lu van dizze generoatsie.
Hailtied last van zenen, kraamp ien hoed, koppien –
omreden t leven t alle moalen van verlaaiden verlust.
Handel
Tiedens beroupenveurlichten, vrouger, het nooit ain derover proat,
(Over zukswat swiegen lu allinneg, din wait je t wel),
terwiel dat hai der wis nou zien ienkomen oet hoalt.
Kiender van t dörp iezen van hom: graauw om kop, groot en grof.
Bosschoppen, gas en licht, n trui ien moat XXL
(Dat mout toch apmoal aargenswoar van betoald),
lieken zo alledoags as ik motterende scooter veur loat.
Bovenkaant mag din glimmen, doaronder is t rousterg en dof.
Bie vaste adreskes stopt ploffiets mit braide banden
(op stander, geduldeg wachtend op heur boas).
Mit schaarpe blik gribbelt vent ien zien tazzen.
As vaarf van heur kezienen bladdert kleur te zien klanten òf.
(Moakt hai ook n proatje over t nijs mit dij puutjes ien handen?)
Achter de poest zakt hai op plof en snoft vot mit geroas.
Scooter en handel zakken vervoarliek deur heur azzen.