Noast de wierde

Piloot, clown, acroboat, alles is
meugelek noadat n kiend veur t eerst
speult met verbeeldingskracht.

Veuruutkieken en genieten tussen de
lokbeelden van mörgen
die ruken noar verlangen en oaventuur.

Leven ien de eigen kozen werklekheid
dat ok bij t noagloeien nog stroalt ien t heldere licht.

Ver vot van de wierde van ernst
woar vroeg ien de middag
elk veuruutzicht verdwient ien de oavendschare.