Hai lusterde noar t giebeln
om hem heen, dronk zien glas
leeg en kneep zien ogen dicht
tegen zun dij langzoam achter
de hoge hoezen stommelde.
t Gekwetel van de kwakganzen,
de fiebelkwinten van de fliemstriekers,
muid wer e dervan en mieterg.
Vrienden werden altied vrumden
wanneer doenighaid indoalde
en schaauw in duuster versmoorde.
Zunder goundag ging hai noar hoes.
Leven in t algemain gaait achteroet
en dat van miezulf in t biezunder,
monkelde hai veur zich oet,
mor hoezen hadden gain meedlieden,
stroatstainen hielden zich doof
en de moan schoof achter n wolk.