Wat ze nait aal
in potjes doun
om op stoet te smeren:
fledder en appelsienen.
Fledder haren wie
in toene: muiken
dopkes van t holt
om op piele te zetten,
nog te gruin, achternoa,
om òfgrond van verlangst
te overbruggen.
Appelsienen kwamen
der loater bie, in
blui bie Sevilla mit
mien laiverd tountertied.
k Zag t veraind in
n potje bie IKEA:
Apelsin & Fläder.
Dou wos k: ons toal
is daiper as tied, wieder
as t laand woar of wie leven.