Wat aans kon k doun
om Victoria Amelina te gedenken.
k Was in Brussel dou zai in Kyiv
heur begraffenis haar. Haar nait
zo wezen mouten, veur heur nait
en doezenden meer dij as soldoat
of deur op n stee te wezen woar
Ruzzen t op begrepen haren.
Mor Victoria Amelina was ok n belofte,
sluig vleugels oet as dichter en schriever,
wol oorlogsmisdoaden vaastleggen
veur Oekraïne en tribunoal in Den Hoag.
Hou groot of zai ok al was, Victoria​​
was te lut veur raket dij bie heur​​
aan toavel kwam in oetverkoren​​​
Kramatorske restaurant op 27 juni.
Vaaier doage het zai nog ​​perbaaierd
in t licht te blieven, mor schare
kroop aal dichter bie, nam heur veur zok in.
Wat kon k aans
as n staarke blonde drinken, zo wied van heur kiste,
n Victoria, dij schutspetroon van Brussel
Sunt Michaël huilp in 1695, zo wilt t verhoal,
om t kwoad te bestrieden, dou zai
op t zulfde moment op 4 juli 2023 in Kyiv’s
Sunt Michaëls kathedroal oetbloazen
wur as taiken dat t kwoad ok
t kloarste licht verduustern kin.