Elk joar op Dag van de Grunneger toal wordt der n weggeefbundel prezenteerd. Ien 2016 was dat de bundel Kört bestek mit columns dij eerder verschenen waren op Webloug. t Joar derveur kwam der n bundel laifdesgedichten oet onder de titel Dast doe dat ik. Dit joar verschient bie de Dag de bundel Zied aan zied, n dubbelbundel mit gedichten van Rieks Holtkamp en Hanne Wilzing. t Is n oetgoave van het Huis van de Groninger Cultuur en t Grunnegs literair tiedschrift Oader. Schier om dizze twij dichters ien ain bundel soamen te brengen.
De ain, Hanne Wilzing, komt van Onstwedde en vertrok op zien zeuventiende, mit t Westerwolds-Grunnegs op zak, noar t Westen. De aander, Rieks Holtkamp is geboren ien Zuudloaren en kreeg t Grunnegs ien twij varianten mit van zien olders; zien moe is van Waarvum en voader van zien pa kwam van Heemskes. Baaide dichters wonen al weer n zetje nait meer ien Grunnen. Mor de laifde veur de eerste toal, t Grunnegs, is bleven en krigt n vörm ien de poëzie.
Wilzing is n socioal betrokken man mit n religieuze ienslag en dat is weerom te lezen ien zien gedichten. Hai gaait op zuik noar aiweghaid ien de tempel van Artemis mor ook bie t deupvat ien t kerkje van Onstwedde: ‘Maank widde swiegende muren / vaalt t hoge olle löcht / tussen tied verdwienen de uren / in ruumte woar man Allerhoogste zöcht’. t Gedicht Stiekeldoorns handelt over vluchtelingen dij as misdoadegers opsloten worden: ‘Under t swiegende stiekeldroad / maank hoge hekken / kieken we nander / in liedenstied / van overvèr in d’ogen’.
Rieks Holtkamp let hom voak inspireren deur waark van schrievers en kunstenoars as H.N. Werkman, Paul Gauguin, Vladimir Majakovski en Boris Pasternak. t Levert op zien beurt weer staark beeldende gedichten op, zoas t gedicht De tocht noar Jeruzalem, schreven bie de Chassidische Legenden, bekende druksels van Werkman: ‘Hest zoks ooit voaren zain? / Zaailen, rood en geel. / Woater en vuur. / Boot verkoold. / (…) Kiek mor ais om die tou. / Gain noorden of zuden, gain / windstreek dij die / bie schobben gript. // Wenst / holdt / die / drievend.’
Wat holdt n dichter drievend? Schrieven. Schrieven om t leven n handvat te geven, om t bestoan vörm te geven. Om aan de ander lezen te loaten. Ien dizze bundel binnen de gedichten van baaide dichters veur elk en ain te lezen. Zied aan zied.
